वडाळी नजिकमध्ये जिल्हा परिषदेच्या माध्यमातून प्राथमिक शिक्षणाच्या दृष्टीने पहिली ते चौथीपर्यंत शाळा उपलब्ध आहे. शाळेचे नाव ‘जिल्हा परिषद प्राथमिक शाळा, वडाळी नजिक’ असे आहे. ‘डिजिटल इंडिया’ या केंद्र सरकारच्या महत्त्वाकांक्षी कार्यक्रमांतर्गत, वडाळी नजिकमधील जिल्हा परिषद प्राथमिक शाळा आता अधिक आधुनिक झाली आहे. वडाळी नजिकच्या ग्रामपंचायतीच्या पुढाकारामुळे ही शाळा डिजिटल करण्यात आली आहे. या शैक्षणिक बदलामुळे, विद्यार्थ्यांना दोन नवीन एल.ई.डी. टीव्हीच्या मदतीने अद्ययावत शिक्षण देणे शक्य झाले आहे, ज्यामुळे शिकणे अधिक सोपे आणि प्रभावी झाले आहे.

या शाळेच्या पायाभूत सुविधांमध्येही मोठी सुधारणा झाली आहे. ग्रामपंचायतीने पिण्याच्या पाण्याची सोय केलेली असून, मुलामुलींसाठी स्वच्छ आणि आधुनिक शौचालये बांधून दिलेली असून, त्यात हँडवॉश आणि स्वच्छ पाण्यासारख्या सर्व मूलभूत सुविधा उपलब्ध आहेत. यामध्ये ‘चाइल्ड फ्रेंडली’ (घसरगुंडी, झोका इत्यादी) युक्त सुविधा उपलब्ध आहेत. शाळेच्या इमारतीला नवीन रंगरंगोटी करण्यात आली असून,आवश्यक फर्निचर (खुर्च्या व बाकडे) देखील उपलब्ध करून देण्यात आले आहे. विद्यार्थ्यांसाठी दोन नवीन वर्गखोल्यांचे बांधकामही सध्या सुरू असून, यामुळे अधिक प्रशस्त जागा उपलब्ध होईल. शाळेतील बोलक्या भिंती देखील रंगविण्यात आल्या आहेत.

या भौतिक सुविधांसोबतच विद्यार्थ्यांच्या सर्वांगीण विकासावरही लक्ष केंद्रित केले जात आहे. विद्यार्थ्यांची आरोग्य तपासणी नियमितपणे केली जाते आणि मध्यान्ह भोजन योजनेअंतर्गत शाळेतच स्वयंपाक करण्याची व्यवस्था आहे. शाळेच्या परिसरामध्ये वृक्षारोपण करण्यात आले असून, लवकरच सुरक्षिततेसाठी सीसीटीव्ही कॅमेरेही बसवले जाणार आहेत. या सर्व बदलांमुळे शाळेचे कामकाज अधिक सुरक्षित व पारदर्शक झाले असून, शिक्षणाचा दर्जा उंचावण्यास मदत होत आहे.