वडाळी नजिकची खरी ओळख केवळ त्याच्या भौगोलिक आणि प्रशासकीय प्रगतीमध्ये नसून, येथील समृद्ध लोकजीवनात आहे. वडाळी नजिकचे ग्रामस्थ अत्यंत साधेपणाने जीवन जगणारे आणि मेहनती स्वभावाचे आहेत. आपल्या मातीशी, संस्कृतीशी आणि परंपरांशी ते मनापासून जोडलेले असल्यामुळे गावात एक आपुलकीची आणि सांस्कृतिक समृद्धीची भावना अनुभवायला मिळते.या गावातील बहुतांश लोक शेतीत रमलेले असून, अनेकजण शेतकरी किंवा शेतमजूर म्हणून काम करतात. मात्र, गावातील तरुण पिढीने शिक्षणाच्या जोरावर शहरी भागांत नोकरी आणि व्यवसायांतही मोठे यश मिळवले आहे. तरीही, हे सर्वजण आपल्या मातीशी आणि मूळ परंपरांशी घट्ट जोडलेले आहेत. शहरी जीवनाचा अनुभव घेत असतानाही, ते आपल्या शेतीची आणि गावाच्या नैतिक मूल्यांची कदर करतात.येथील लोक ‘साधे जीवन आणि उच्च विचार’ या तत्त्वानुसार चालतात, वागतात व एकमेकांना सहकार्य करत,आनंदात आणि शांततेत जीवन जगत आहेत.

वडाळी नजिकमध्ये लोकांचा, विशेषतः विविध स्वयंसाहाय्य बचत गटांद्वारे महिलांचा, ग्रामविकास तसेच सांस्कृतिक उपक्रमांमध्ये मोठा सहभाग दिसून येत आहे. गावात आणि पंचक्रोशीमध्ये द्राक्षे तसेच इतर फळे आणि भाजीपाला यांचे उत्पादन मोठ्या प्रमाणात घेतले जाते. नाशिक शहर आणि मुंबई-आग्रा महामार्ग जवळ असल्यामुळे,वाहतूक खर्च आणि वेळ वाचतो त्यामुळे या प्रदेशात आणि महामार्गालगत शीतगृहे उभारण्यात आली आहेत. उत्तम रस्ते जोडणीमुळे मालाची वाहतूक करणे सोपे झाले आहे. या शीतगृहांमुळे गावात रोजगाराच्या संधी वाढल्या आहेत. त्याचप्रमाणे, पिंपळगाव बसवंत येथील कृषी उत्पन्न बाजार समिती गावापासून फक्त २०-२५ मिनिटांच्या अंतरावर असल्याने, शेती आणि कृषी उत्पादनांवर अवलंबून असलेले तरुणांना रोजगाराची मोठी संधी मिळाली आहे. कादवा नदीच्या पाण्यामुळे वर्षभर पाण्याची उपलब्धता असते, ज्यामुळे येथील शेतकरी उन्हाळ्याच्या मध्यापर्यंत पिके घेऊ शकतात.